Volana vitsy nijoroany, miezaka mampandroso hatrany ny taranja volley-ball, ny eo anivon’ny ligin’Analamanga. Taorian’ny fifaninanana « service, réception, attaque », niroso tamin’ny fanofanana mpitsara indray ny LRVB, nanomboka ny faramparan’ny volana novambra teo. Vita ny fanadinana ho an’ireto mpiofana ho mpitsara ireto, ny 25 tamin’izy ireo no afa-panadinana ka voatendry ho mpitsara vaovao eo anivon’ny ligin’Analamanga, taranja volley-ball. Mbola misy ny fanaraha-maso akaiky azy ireo amin’ny fitsarana lalao ataony mba ho tena matihanina tanteraka, araka ny fanazavana azo. Olana mateti-pitranga ny tsy fahafehezan’ny Malagasy mpitsara ny fitsarana lalao, rehefa misy fifaninanana. Antony lehibe nandrisika ny ligy hanome fiofanana matihanina sy hanampy isa ireo mpitsara eto Analamanga izany.
Etsy ankilany, mizotra antsakany sy andavany ny fiadiana ny ho tompondaka an’Analamanga, taranja volley-ball. Tontosa ny faran’ny herinandro teo ny andro voalohany, hatao ny 9 sy 10 desambra izao ny andro faharoa. Hiato kely ny fifaninanana ny 15 sy 16 desambra ary hiditra amin’ny andro fahatelo kosa ny 23 sy 24 desambra izao.
Mi.Raz
French