Raha tsy misy ny fiovana, hotanterahina amin’ny volana janoary ireo lalao roa ireo.
Tafiditra ao anatin’ny fanomanan-tenan’ny ekipam-pirenena Malagasy, dia mety hisy lalao ara-pirahalahiana hifandonan’ny Barea amin’i Maroc sy i Mozambique. Nanambara izany i Rakotondrabe Romuald Felix (Rôrô), mpanazatra ny Barea, tao amin’ny tambajotran-tseraserany, afakomaly. Raha tsy misy ny fiovana, hotanterahina amin’ny volana janoary ireo lalao roa ireo. Tsy mbola nambarany kosa ny kianja hanatontosana ny fihaonana.
Ankoatra izay, manoloana ireo resa-be miparitaka ao anaty tambajotra momba ireo mpilalao mandrafitra ny ekipam-pirenena, nanao antso avo izy mba hampitsahatra sy tsy haneho hevitra mahakasika azy ireo intsony. “Fanohanana sy fanampiana ireo mpilalao no tokony hatao fa tsy fanakianana”, hoy izy.
Tsiahivina fa any amin’ny volana jona 2024 indray vao hiditra an-tsehatra hanohy ny fifanintsanana hiadian-toerana ho an’ny “Mondial 2026” ny Barea, Handray an’i Comores sy i Mali eo amin’ny andro fahatelo sy fahefatra isika.
Hatramin’izao, eo amin’ny laharana fahatelo ny Barea de Madagascar ao amin’ny vondrona “I” misy azy, manana isa 3. Mitarika i Comores, nahazo isa 6, arahin’i Mali, isa 4. Ghana ny fahefatra manana isa 3, arahin’i Centrafrique, isa 1 ary farany i Tchad tsy mbola nahazo isa.
Tompondaka
French