Notanterahina tany Egypta, ny herinandro teo, ny andiany fahatelo amin’ny hetsika « EDEX », « Egypt Defence Expo 2023 », Teo ambany fiahian’ny filohan’ny Repoblikan’i Arabo any Egypta sady filoha faratampon’ny Tafika egypsiana, Abdel Fata El Sisi. Ny Tafika egypsiana no tompon’antoka tamin’ny fikarakarana izany hetsika anisan’ny lehibe indrindra amin’ireo fampirantiana ara-piarovana aty amin’ny tapany avaratr’i Afrika. Ireo tomponandraikitra ambony misahana ny fiarovana avy amin’ireo firenena miisa 105 manerana izao tontolo izao no voaasa ho mpandray anjara tamin’ity indray mitoraka ity. Anisan’ ireo nahazo fanasana i Madagasikara tamin’ny alalan’ny minisitry ny Fiarovam-pirenena (MDN), ny Jly Rakotoarijaona Josoa. Fotoana manokana hanomezana sehatra ho an’ireo mpampiranty, hampisehoana ireo hiaka farany amin’ny fitaovam-piadiana sy kojakoja ara-miaramila, mifanaraka amin’ny teknolojia vaovao sy fampiasa amin’ireo vondron-tafika an-tanety sy ana habakabaka ary an-dranomasina. Mandritra izany no hanaovan’ireo tomponandraikitry ny fiarovana fihaonana sy fifampizarana traikefa eo amin’ny samy firenena ka handrindrana ireo teti-pivoarana mahomby rehetra. Nihaona manokana tamin’ny minisitry ny Fiarovam-pirenena egypsiana, ny Jly Mohamed Zaki, ny MDN. Tombony lehibe ho an’i Madagasikara, araka izany, ny fandraisana anjara amin’ity « EDEX 2023 » ity mba ho fanatsarana ireo teknika ara-pitaovana sy ireo paikady mifanaraka amin’ny lenta iraisam-pirenena eo amin’ny sehatry ny fiarovana. « Tanjona ny hampiakarana ambony ny tahan’ny fandriampahalemana manerana ny faritra rehetra na efa misy hatrany aza ireo ezaka maro atao eny an-kianja sy eny amin’ny sehatra maro samihafa », hoy ny MDN.
Jean Claude
French