Mitohy ny fanohanan’ny fikambanana Zanak’ Ambohidratrimo Marovatana (Zam) ny mponina eny ifotony. Nahazo rano fisotro ny fokonolona any amin’ny fokontany Ampanataovana, ny herinandro lasa teo. Nomena masomboly koa ny tantsaha, amin’izao taom-pambolena izao.
Nahazo tohana ara-bola ny mpianatry ny EPP avy amin’ ny fianakaviana sahirana. Mpianatry ny kilasy T4 ao amin’ny EPP i Ny Avo, zazavavy kely kamboty ray ary marary saina ny reniny, ka ny renibeny no mitaiza azy sy i Nasandratra zokiny. Saika hajanona tsy hianatra intsony izy, satria tsy manam-bola handoavana ny saram-pisoratana anarana. «Mankasitraka sy misaotra ny filohan’ny Zam, Rabary Hery, tena mitsinjo ny madinika sy ny sahirana toa anay», hoy ny renibeny.
Tany an-dohasaha no mantsaka rano ny mponina hatramin’izay satria efa simba hatry ny ela ny paompy eo Ampanataovana. Nilaza ny filohan’ny Zam, Rabary Hery, fa «nanapa-kevitra ny Zam, nividy fitaovana lafo, nanamboarana ny paompy mba hisitrahan’ny mponina rano fisotro madio». Nahazo baolina kitra koa ny mpanao fanatanjahantena.
Njaka A.
French