Mitohy ny fanokafana ny taom-pamokarana 2023-2024, sady fizarana kojakojam-pamokarana ho an’ny tantsaha, ao anatin’ny tetikasa Purpa, tanterahin’ny minisiteran’ny Fambolena sy ny fiompiana (Minae). Nisitraka ny azy ny faritra Sofia sy Betsiboka, ny herinandro lasa teo. Ho an’ny faritra Sofia, miisa 131 ny tantsaha any amin’ny kaominina Tanambao, Matsaborilemby, Tsarahasina ary Port-Bergé, nahazo masomboly milanja 1 572 kg. Milanja 2 620 kg ny zezi-bazaha NPK nozaraina sy zezika biolojika 13 100 kilao.
Ho an’ny faritra Betsiboka, natao tany amin’ny kaominina Tsararano, distrika Maevatanana, ny fizarana. Miisa 350 ny tantsaha nahazo masomboly vary an-tanety milanja 8 400 kg, zezika NPK 7 000 kg ary zezika biolojika 35 000 kilao.
Ny 10% ihany no aloa
Marihina fa ny 10%-n’ny vidin’ireo kojakojam-pamokarana ihany no aloan’ny tantsaha misitraka ny fanampiana. Tanjona amin’izao tohana izao ny hanatrarana ny fampiakarana ny vokatra sy ny fahavitan-tena ara-tsakafo.
Mamatsy vola ny tetikasa “Purpa” ny Banky afrikanina ho an’ny fampandrosoana (Bad), miara- miasa amin’ny Tahirim-bola ho fampandrosoana ny famokarana (FDA).
Efa maro ny kaominina any amin’ny faritra nisitraka ny fanampiana toy izao, ao anatin’ny fanokafana ny taom-pambolena 2023-2024. Mitohy any amin’ny faritra hafa ny hetsika ataon’ny Minae, toy ny any Vakinankaratra.
Njaka A.
French