Nitondra fanazavana tetsy Mahamasina, omaly, ireo tomponandraikitra isan-tokony amin’ny fanatanterahana ny lanonana fametrahana ny filohan’ny Repoblika ny sabotsy izao. Efa vonona avokoa ny arofenitra rehetra sy ny fandrindrana ny filaminana.
Hisokatra amin’ny 6 ora maraina ny vavahadin’ ny kianjabe. “Hizarana tapakila avokoa ireo rehetra hanatrika ny lanonana ary tsy hisy ny vidim-pidirana”, hoy ny mpandrindra ankapobeny ny hetsika, Rahelisoa Virginie.
Tomombana avokoa ny arofenitra rehetra hiarovana ireo olom-panjakana ambony avy any ivelany sy avy eto an-toerana. “Tsy hilefitra izahay fa hisambotra avy hatrany ireo minia manakorontana”, hoy kosa ny eo anivon’ny Emmo/ Nat. Maherin’ny 6 000 rahateo ireo mpitandro filaminana hahetsika amin’io fotoana hanaovan’ny filoham-pirenena ny fianianana io. Hotanterahina ny tapany maraina ny fianianana. Hitarika izany fotoam-pitsarana manetriketrika izany ny filohan’ny Fitsarana avo momba ny Lalàmpanorenana (HCC).
Fiaingana vaovao
Manao ny fianianana eo anatrehan’ny firenena sy ny governemanta, ny Antenimierampirenena sy ny Antenimierandoholona, ary ny fitsarana tampony ny filohan’ny Repoblika. “ Eto anatrehan’ Andriamanitra Andriananahary sy ny firenena ary ny vahoaka, mianiana aho fa hanatanteraka antsakany sy andavany ary amim-pahamarinana ny andraikitra lehibe maha filohan’ ny firenena malagasy ahy.
Mianiana aho fa hampiasa ny fahefana natolotra ahy ary hanokana ny heriko rehetra hiarovana sy hanamafisana ny firaisam-pirenena sy ny zon’olombelona.
Mianiana aho fa hanaja sy hitandrina toy ny anakandriamaso ny Lalàmpanorenana sy ny lalàm-panjakana, hikatsaka hatrany ny soa ho an’ny vahoaka malagasy tsy ankanavaka ”.
Manomboka ny andro anaovana izany fianianana izany ny fe-potoana hiasan’ny filohan’ny Repoblika ho an’ny dimy taona manaraka.
Synèse R.
French