Olona 11 naratra niharan’ny lozam-pifamoivoizana tao Miandrivazo, afakomaly maraina. Nisedra olana teknika ny fiara ka namantana tamin’ny trano fisakafoana amoron-dalana. Naratra mafy ny mpamily. Efa manaraka fitsaboana izy sy ireo mpandeha hafa naratra.
Hotohoton’ny afo ny trano miisa roa tao Ambohimasina Arivonimamo, ny sabotsy 6 janoary teo. Nandeha nanao asa tany an-tsaha ny tompon-trano no nifampiantsoin’ny manodidina fa kilan’ny afo ny tafo. Niitatra tamin’ny trano iray tsy lavitra teo ny firehetana. Vokany, trano roa may.
Trano fisotroana iray novakian’ny jiolahy tao Tanambao Verrerie Taomasina, omaly maraina tamin’ny 1 ora. Lasan’ny jiolahy ny menaka 20 litatra niampy ordinatera ary ny vola matin’ny mpivarotra ny alin’ny alahady.
Efa nahazo fahasalamana ilay tompona orinasa misehatra amin’ny fizahantany niharan’ny fanapoizinana ara-tsakafo tao Nosy Be, ny faran’ny herinandro teo. Nanamafy izy fa niniana natao mihitsy ny famonoana azy fa tsy voajanahary velively.
French