Vehivavy hita faty tao anaty lavadrano tao Ambohijanadralambo, kaominin’i Morarano, distrikan’Arivonimamo, afakomaly. Nifono tao anaty gony ity ramatoa ity ary ahin’ireo nanatri-maso ho niharan’ny fanolanana. Efa potika tanteraka ny endriny. Manao fanadihadiana ny zandary ao an-toerana.
Mpanolana iray matin’ny fitsaram-bahoaka tao Ambalamahogo Andraijoro, kaominin’i Bekoratsaka, distrikan’i Mampikony, ny alahady 7 janoary teo. Vao namita sazy tany am-ponja io lehilahy io. Nanolan-jaza 9 taona indray anefa izy. Nosamborin’ny fokonolona ka nikasa hanohitra. Notaperin’ireo mpiray tanàna ny ainy.
Vehivavy mpivarotra rongony sy ny namany voasambotry ny zandary tetsy Ambohitrimanjaka, omaly maraina. Efa mpamatsy io zava-mahadomelina io ao Fiakarana ity voasambotra ity, araka ny fanamafisan’ny zandary. Nahatrarana rongony 34 fonosana niampy 500 grama teny aminy.
Saron’ny zandary tao Ambatovy ny mpangalatra moto iray, omaly. Niditra antsokosoko tao amin’ny fiantsonan’ny fiara sy ny moton’io orinasa io ity olon-dratsy ity. Novelominy ny moto iray ary nentiny nandositra. Maty anefa ilay moto tonga teo anoloan’ny zandary mpanakan-dalana. Nosavaina ilay lehilahy ka noraisim-potsiny.
French