Mandalo eto Madagasikara ny Maitre international (MI) Rakotomaharo Fy, Malagasy mpilalao, taranja Echec, mila ravinahitra any Frantsa. Nisy ny resadresaka nifanaovana taminy.
Gazety Taratra(*): Mandalo eto Madagasikara ianao, misy antony manokana ve ahatongavanao eto?
Rakotomaharo Fy(-): Araka ny efa fantatra, tanterahina eto Madagasikara ny fiadiana ny tompondakan’i Afrika, Zone 4.4, taranja Echec. Izany indrindra no ahatongavako eto. Tanjoko ny hahazoana ny voalohany amin’ity fifaninanana ity.
*Ankoatra izay, inona ihany koa ny tanjonao amin’ity taona 2024 ity?
– Tanjona lehibe hotratrariko amin’ity taona ity ny hahazoako ny anaram-boninahitra “Grand maitre international”. “Norme” iray sy isa 40 eo sisa no enjehiko dia ho tratrako io tanjona io. Efa manana “normes” 2 sy 2 460 Elo aho amin’ izao. Betsaka ny fifaninanana hatrehiko amin’ity taom-pilalaovana ity ka mino aho fa ho azoko io anarana GMI io amin’ ity taona ity.
*Inona avy ireo fifaninanana hatrehinao amin’ity taona ity ireo?
– Aorian’ity fiadiana ny ho tompondakan’i Afrika Zone 4.4 ity, hanohy ny lalao isam-bondrona hatao any Allemagne aho, hatramin’ny volana marsa izao. Manana klioba ao Allemagne “Bad Mergentheim» aho. Ho any Ghana aorian’izay hiatrika ny “One African Games”, hatao ny 8-12 marsa. Ny fiadiana ny tompondakan’i Frantsa kosa aorian’izay, manana Klioba “Mulhouse Philidor” ihany koa aho. Ny “Olympiade” amin’ny volana septambra 2024 no tena zava-dehibe, izay hatao any Hongrie.
*Inona no azonao ambara raha manao jery todika ny 2 taona lasa?
– Ny taona 2022 ny vokatra tsara indrindra ho ahy izay nahazoako ny “normes” 2 GMI. Antonony kosa ny vokatra azoko ny taona 2023 ary somary nilatsaka kely ny Elo, na dia betsaka aza ny fifaninanana natrehina.
Mi.Raz
French