Dimy lahy tsy ampy taona voasambotry ny polisy tao Mahajanga. Manendaka eny amin’ny faritr’i Tsararano sy ny manodidina izy ireo. Nanao paikady manokana nanatrarana ireto tontakely ireto ny mpitandro filaminana ao an-toerana noho ny hamaroan’ny fitarainana. Marihina fa 13 ka hatramin’ny 15 taona avokoa ireto andian-jatovo sarona ireto.
Dahalo miisa roa azo sambo-belona tao amin’ny distrikan’Ankazobe, nandritra ny hetsika manokana nataon’ny mpitandro filaminana. Taorian’ny fahafatesan’ny ben’ny Tanàna iray anatin’io distrika io, nanamafy ny hazalambo manoloana ireo dahalo mpangalatr’omby sy mpaka an-keriny ao an-toerana ny zandarimaria sy ny Tafika ary ny fokonolona.
Mpivady nangalatra varavaram-by an’ny fiangonana voasambotry ny zandary tao Soanierana, fokontany Ambohimilemaka, kaominina ambanivohitra Mahitsy, ny alin’ny 10 janoary teo. Tsikaritry ny mpiara-monina ny fihetsika hafahafa nataon’izy mivady nandritra ny fitaomany entana. Nampandre ny manam-pahefana, noho izany, ny fokonolona ka noraisim-potsiny izy mivady.
Lehilahy iray mpanao sinto-mahery voasambotry ny mpitandro filaminana tetsy Andrefan’ Ambohijanahary, omaly maraina. Nikasa handositra io mpanao ratsy io saingy tsy lasa alavitra. Nentina natao famotorana ary hatolotra ny fampanoavana izy aorian’izany.
French