TSELATRA

Zazavavy 12 taona maty niharan’ny fanolanana tao Morondava, ny alakamisy 18 janoary teo. Nifampitadiavan’ny fianakaviana io zaza io nanomboka ny alatsinainy. Nametraka fitarainana teny amin’ny mpitandro filaminana izy ireo. Narian’ny nahavanon-doza tsy lavitra ny trano fonenany ihany ny nofo mangatsiakan’ ilay zaza efatra andro taorian’ny fahaverezany.
Mpampianatra iray maty voatsatok’antsy nataon’ny zaodahiny tao Sahafatra, kaominina Tovona, distrikan’i Farafangana, ny alatsinainy 15 janoary teo. Fifamaliana avy tao amin’ny trano fisotroana no niteraka ny loza. Nitsoaka ilay nahavanon-doza.
Nidoboka am-ponja ny faran’ny herinandro teo, ny lehilahy iray namono ny rafilahiny tao Vohitraivo, kaominina Ampasina Maningory, distrikan’ i Fenoarivo Atsinanana. Sakaizan’ny zazavavy vadin’io tovolahy io ilay lehilahy 68 taona maty novonoiny. Nentiny nandositra niaraka taminy ilay zazavavy taorian’ny habibiana ka niara-tratra izy roa.
Lehilahy iray hita faty tao amin’ny ranon’ Imandry Fianarantsoa, ny faran’ny herinandro teo. Nahita ny mpitsabo nitily ny razana fa nisy ratra ny vatan’io lehilahy io. Mpandalo maraina no nahatsikaritra ny fatiny ka niantso ny mpitandro filaminana.