Hotanterahina ny 3 sy ny 4 febroary ho avy izao ny lalao fifanintsanana basikety, sokajy vehivavy U23, 3X3, any amin’ny ligim-paritr’i Bongolava. Tsiahivina fa izay tompondaka amin’ity no hisolo tena an’i Bongolava amin’ny fifaninanana « De la Rue vers l’Or », izay hatao eto Antananarivo, ny 16-18 febroary.
Nifindra klioba any Seychelles i Jean Claude Marobe, Malagasy vodilaharana. Ao amin’ny klioban’ny Anse Reunion FC izy no hilalao, araka ny vaovao azo omaly. Tsiahivina fa nilalao tao amin’ny klioban’ny Fosa Junior FC Boeny ny tenany teo aloha.
Tafita any amin’ny ampahavalon-dalan’ny “Coupe de France” ny klioban’ny Sochaux FC, ilalaovan’i Thomas Fontaine, Malagasy vodilaharana. Marihina fa lavon’izy ireo tany amin’ny fandakana “tirs au but” 5 no ho 4 ny Stade de Reims, kliobany fahiny. Tsiahivina fa mpilalao mbola manana ny toerany ao amin’ny Barea de Madagascar i Fontaine.
Nahazo fandresena indray ny ekipan’ny Real Madrid FC, tamin’ny fiadiana ny ho tompondakan’i Espagne “La Liga”, ny alahady lasa teo. Lavon’izy ireo tamin’ny isa 3 no ho 2 ny ekipan’ny Almeria raha toa ka nitarika 2 no ho 0 teo amin’ny fizaram-potoana voalohany ity farany.
French