Lehilahy nanolan-jaza tany amin’ny fokontany Ampefindradama, kaominin’Ampefy, distrikan’i Soavinandriana, faritr’Itasy, naiditra eny Tsiafahy, omaly. Nampihatra ny filan-dratsiny tamin’io zazavavy io ny fiatombohan’ny volana janoary teo izy. Notambazany vola 500 Ar ilay zaza.
Roa lahy mpidoroka rongony sady mpanendaka voasambotry ny mpitandro filaminana teny Behenjy, kaominina Itaosy, omaly. Vinanton’ilay rangahy voasambotra ihany io mpiara-manao asa ratsy aminy io. Nahatrarana “puce” 85 isa tao an-tranon’izy ireo.
Moto roa nifandona ka naratra mafy ireo mpitondra izany tetsy Talatamaty, omaly. Nisongona fiara ny iray ka nifatratra tamin’ny moto nifanoha-dalana taminy. Potika tanteraka ny iray tamin’ireo moto. Nentina haingana namonjy hopitaly izy roa lahy niharam-boina.
Mpangala-jaza iray voasambotry ny mpitandro filaminana tao Fianarantsoa, omaly. Nalainy antsokosoko tao Ambatolahy Ranomafana, distrikan’Ifanadiana, io zaza io rehefa nivahiny tao amin’ny ray aman-drenin’ny lasibatra izy. Tra-tehaky ny zandary miasa ao Vohiparara ity mpangala-jaza ity sy ny olona iray hafa notondroiny ho namany.
French