Nanao lalao ara-pirahalahiana entina hanomanana ny “Pureplay football league”, ny Fosa Junior FC Boeny sy ny Mama FC Fianarantsoa. Lavon’ny Fosa tamin’ny isa 2 no ho 0 ny Mama FC tamin’ity fihaonana ity. Fifanandrinana natao ny alakamisy lasa teo, teny amin’ny kianja annexe Mahamasina.
Hotanterahina manomboka anio ny lalao fifanintsanana ho an’ny ligim-paritra Matsiatra Ambony, taranja basikety 3×3, sokajy vehivavy U23. Marihina fa izay voahosotra ho tompondaka eo no hisolo tena an’i Matsiatra Ambony amin’ilay fifaninanana “De la Rue vers l’Or”, eto Antananarivo.
Hotontosaina manomboka anio ny lalao ampahavalon-dalan’ny fiadiana ny ho tompondakan’i Afrika, “Can Côte d’Ivoire 2023”. Anisan’ireo lalao tena andrasan’ny maro amin’izany ny fihaonana eo amin’i Nigeria sy i Cameroun. Marihina fa hanomboka amin’ny 11 ora alina, ora aty amintsika ity fihaonana ity.
Araka ny vaovao niely tao anaty tambajotran-tserasera, omaly, tsy hanazatra ny klioban’ny Liverpool Angleterre intsony i Jürgen Klopp, teratany alemà. Hiala ny tenany rehefa tapitra tanteraka ny taom-pilalaovana 2023-2024. Tsiahivina fa tamin’ireo lalao 462 nitondrany ny Liverpool, nahazo fandresena 286 izy sy amboara 7 ny ekipany.
French