Fantatra avokoa ireo hira voatsonga isan-tsokajy. Nitondra fanazavana mahakasika izany sy ny “RDJ Mozika” amin’ny ankapobeny ny mpikarakara, omaly.
“Arakaraky ny fivoaran’ny mozika ny sokajy hampidiranay ny hira. Miovaova isan-taona izany, ka izay no mampiovaova koa ny sokajy misy. Marihinay foana fa ireo dia hira sanganasan’ireo mpanakanto izay nateriny na nalefany taty amin’ny RDJ, nahazo ny fankatoavana fa afaka mandeha amin’ny onjampeo. Arakaraka ny fitiavan’ny mpihaino azy sy ny fangatahan’ izy ireo matetika ny hira indray no maha voafidy azy isan-tsokajy, izany hoe izay hira mendrika izany”. Fanazavana nentin-dRasolojaona Tahiana na i Jaytaxx, tale jeneralin’ny RDJ io. Nisy ny fihaonana tamin’ ireo mpanao gazety sy ireo mpanakanto, nitondrana ny fanazavana mahakasika ny “RDJ Mozika”, na dia efa hiditra amin’ny andiany faha-19 aza amin’ity.
Sokajy 21, araka izany, no voatana amin’ny “RDJ Mozika 2023”. Ireo hira voarain’ny RDJ nanomboka ny 1 novambra 2022 hatramin’ny 30 novambra 2023 no nisafidianana ireo. “Ny hira fa tsy ny mpanakanto no safidianay isan-tsokajy. Komity manokana ato amin’ny RDJ no nanao ny safidy izay hira hifaninana. Ny mpankafy sy ny mpihaino kosa no hifidy manontolo ny isan-tsokajy”, hoy i Mira Mialy Harinosy, tompon’andraikitry ny komity mpihaino ao amin’ny onjampeo.
Toa ny efa nahafantarana azy, hetsika iray goavana ihany koa ny fotoana fanambarana izay mendrika isan-tsokajy. Hivelatra ho an’ny mpankafy izany amin’ity, satria haka endrika seho goavana, izay hotontosaina etsy amin’ ny Lapan’ny fanatanjahantena sy ny kolontsaina Mahamasina, ny alahady 4 febroary izao. Hanafana ny seho, anelanelan’ ny fizarana mari-pankasitrahana ry Rossy, Wawa, Henika, Big MJ, Rim-Ka, Ayam, Njara Marcel, Bolo, Agrad, Parish, Johanne, Minah Bolimakoa, sns.
Zo ny Aina
French