Nambaran’ny tale jeneralin’ny fadin-tseranana (DGD), Lainkana Zafivanona, fa fanondranana antsokosoko tamin’ny taona 2014 ilay raharaha andramena tany Tanzania. Filoha miara-mitantana ny fifanarahana hanamorana ny fifanakalozana ara-barotra iraisam-pirenena ihany koa ny tenany.
Nisy andramena avy aty Madagasikara tratra tany amin’ny seranan-tsambon’i Mombassa (port d’éclatement) any Kenya, natao tanaty kaontenera miisa 34 (amin’ny 20 pieds), ny volana mey 2014, saika naondrana antsokosoko any Hong-Kong, araka ny lalàna Cites tovana II (annexe). Nivoaka ny taona 2021 ny didim-pitsarana kenyana, ka nogiazana sady nafindra tanaty kaontenera miisa 22 (amin’ny 40 pieds).
Nivoatra ny raharaha, ka nilaza ny DG-n’ny ladoany, Lainkana Zafivanona, fa nisy ny famoahana ireo andramena ireo tany Kenya, hotaterina any Dubaï, Emirates Unis. Nandalo tao amin’ny seranan-tsambon’i Tanzania, ka tratran’ny tomponandraikitra tany an-toerana indray, fanondranana antsokosoko, ny desambra 2022. Taorian’izany, nandray fepetra ny fanjakana malagasy ka nifampiraharaha tamin’ny tomponandraikitra tanzaniana ny hampodiana ireo andramena ireo aty Madagasikara, nanomboka ny oktobra 2023. «Mangaraharaha ny hetsika natao, satria niarahana tamin’ny tomponandraikitry ny Firenena mikambana sy ny sampandraharaha voakasika», hoy ihany ny DGD, Lainkana Zafivanona. Nomarihiny koa fa tafiditra ao anatin’ireo andramena efa vita fanisana ireo tratra tany Tanzania ireo satria misy loko mari-pamantarana, araka ny fanisana natao tamin’ny taona 2014, niarahana tamin’ny Banky iraisam-pirenena.
Fanamorana ny varotra iraisam-pirenena
Marihina fa nandritra ny fihaonan’ny DGD tamin’ny mpanao gazety, taorian’ny fanokafana ny fivoriambe ara-potoana nataon’ny Fifanarahana hanamorana ny fifandraisana ara-barotra, CFEC teny Ivandry, omaly, no nitondran’ny DGD, Lainkana Zafivanona, ity fanazavana mahakasika ny raharaha andramena tany Tanzania ity. Fivoriana natao omaly sy anio, nentina nanaovana jery todika ny zava-bita sy nijerena ny lesoka harenina na koa mila hatsaraina ho an’ny taona 2018-2023. Miisa 18 ny paikady nofaritana ka maherin’ny 50%-n’ny tanjona no efa tratra.
Njaka Andriantefoiarinesy
French