Niantraika tamin’ny lalana maro eto amintsika ny rotsakorana nisesy amin’izao fotoam-pahavaratra izao, indrindra ny any amin’ny tapany avaratry ny Nosy. Anisan’ izany ny fahatapahan’ny lalam-pirenena RN32, nandritra ny ora maromaro, mampifandray an’Antsohihy sy Mandritsara, PK26, any amin’ny kaominina Ampombolava. Nanampy trotraka ny fahasimbana ny tsy fisian’ny fantsom-be (buse) ao ambany lalana.
Nidina avy hatrany any an-toerana ny teknisian’ny Fitantanam-paritry ny Asa vaventy (DRTP) Sofia, niaraka tamin’ny fiarabe sy ny fitaovana vaventin’ny faritra. Vita ny sabotsy 3 febroary teo ny asa fanarenana, toy ny fanotofana ny lavaka sy ny fandravonana ny lalana.
Nandray anjara tamin’ny fandrindrana sy ny fandaminana ny fifamoivoizana ny mpitandro filaminana.
Ankoatra izay, nisy fahasimbana koa ny lalam-pirenena RN6, vokatry ny rano miakatra sy ny tany mihotsaka
ary ny fotaka mandrevo. Voakasik’izany ny teo amin’ny PK 90, fokontany Antsijofary, distrika Mampikony, faritra Sofia. Tapaka ny lalana satria nisy fiarabe miisa roa niraikitra anaty lalana, ny 2 febroary, ka nitohana ny fifamoivoizana. Novahana ny olana ka efa afa-misisika ny fiara kely. Dingana manaraka hataon’ny tomponandraikitra any an-toerana ny hisintomana ireo fiarabe roa ireo. Aorian’izay vao afaka hototofana tany ny lavaka, hataon’ny orinasa Rasoanirina.
Njaka A.
French