Ankoatra ny fametrahana tetezamby, misy asa fanampiny ihany koa ataon’ny Fitantanam-paritry ny asa vaventy (DRTP) Itasy, any Antanetimboahangy Analavory, amin’ny lalam-pirenena voalohany, RN1, eo amin’ny PK 104+800, nanomboka omaly 5 febroary. Nohamafisina ny andrin-tany ao ambanin’ilay tetezamby, izay marihina fa arabe nihotsahan’ny rano, vokatry ny orambe. Nametrahana rarihazo sy gonim-pasika, hiaro ny fihotsahan’ny tany.
Asa vonjimaika ity natao ity, fa tsy maintsy havaozina tanteraka ny lalana ary hametrahana tetezana amin’ny fomba maharitra aorian’ny fotoam-pahavaratra. Tsiahivina fa indroa nihotsaka ity lalana ity, tamin’izao vanim-potoan’ny orana izao. Nihotsaka ny arabe tamin’ny voalohany, ary nihotsaka koa ilay tetezamby taty aoriana, ka voatery tsy maintsy nohalavaina sy nohamafisina ny fidirana ao aminy.
Mizotra araka ny tokony ho izy, ankehitriny, ny fifamoivoizana amin’ny lalam-pirenena RN1, mampitohy an’Antananarivo sy Tsiroanomandidy.
Njaka A.
French