“Tena diso lalana ireo”, hoy ny fanehoan-kevitry filoha nasionalin’ny antoko TGV, faritany Antananarivo, sady governoran’ny faritra Analamanga, Rasoamaromaka Hery, teny Antaninarenina, omaly, ny amin’ny Antenimieran’ny raiamandreny foko malagasy (ARFM), izay milaza hitarika vahoaka amin’ny fitokonana faobe ho amin’ny fitondrana Tetezamita hananganana fanjakana tena malagasy. Tsy fidinana an-dalambe na fitokonambe na fananganana fitondrana Tetezamita intsony izao ny lalana, fa izay hampandrosoana an’i Madagasikara. Ny zava-misy hatrehina amin’izao dia ny hanatanterahana ny fifidianana ben’ny Tanàna sy ny mpanolotsain’ny Tanàna. Eo koa ny fifidianana solombavambahoaka. Asaina mirotsa-kofidina sy mandrotsaka olon-kofidina amin’izany ry zareo, fa mbola vintana indray mandeha na mety ho voafidy amin’izany. Tsy mahazaka olona ry zareo, matoa tsy mahasarika olona amin’izay lazainy sy ataony. Manahirana ny mifandinika eto Madagasikara. Manambara ny heviny ry zareo, fa aoka kosa ho ao anatin’ny fanajana lalàna. Aza mandika lalàna, fa misy ny sazy miandry raha vao mandeha amin’izany.
R. Nd.
French