Tontosa tetsy Ambohidratrimo, ny faran’ny herinandro teo ny “Festival fanorona”, andiany voalohany. Hetsika nokarakarain’i Souleman Mpikabary sy ireo mpiara-miombon’antoka aminy. Tanjona ny hampivoatra sy hamelo-maso indray ny kolontsaina malagasy amin’ny alalan’ny fanorona. “Mifototra amin’ny fanorona avokoa ny foto-kevitra sy ny fiainanan’ny Malagasy rehetra”, hoy i Souleman Mpikabary, nandritra ny hetsika.
Nilaza izy fa ilaina fanorona avokoa ny fitantanana ny fiainana sy ny tokantrano ary ny firenena. Nohamafisiny hatrany fa mitondra ny Malagasy any amin’ny fandrosoana ihany koa io kilalao iray io. “Taloha tsy nahazo nitondra fanjakana mihitsy ny olona iray raha tsy mahay fanorona”, hoy izy nanazava.
Hamerenan-kasina ny Rovan’Ambohidratrimo
Maro ny hetsika hita teny an-toerana nandritra ny roa andro. Anisan’izany ny lalao famaranana ho an’ny fifaninanana manao fanorona. Teo koa ny seho nataon’ny mpanakanto ara-drazana. Ankoatra izay, nandinihina ny hevitra samihafa mahakasika ny tontolon’ny fanorona ihany koa teny an-toerana. Renivohitry ny fanorona i Ambohidratrimo. Nosokafana tamin’ny dinika hamerenan-kasina ny Rovan’Ambohidratrimo ny fetiben’ny fanorona. Misedra olana io Rova io ankehitriny taorian’ny nahamay azy, ka noresahana ny fomba hamerenan-kasina izany.
Tafiditra ao anatin’ny fankalazana ny faha-20 taona nikabarian’i Souleman Mpikabary ny hetsika. Hihatsara kokoa ny andiany faharoa amin’ny taona ho avy.
Mino
French