Heverina fa ilaina maika ny fiverenana fijerena ny lalàna fehizoro lah. 2018-008 mifanaraka amin’ny fifidianana ankapobeny sy ny fitsapan-kevi-bahoaka, singanina amin’izany ireo mifandraika amin’ny fepetran’ny fangaraharan’ny fandaniana amin’ny fifidianana, araka ny fanambaran’ny Hetsika Rohy, misy fikambanana 78 nanao sonia, nampitainy tamin’ny tranonkalam-pifandraisana, omaly.
Eo ny fanalalahana ny toerana iombonana amin’ny alalan’ny fanafoanana ny lalàna lah. 60-082, ny 13 aogositra 1960, mifandraika amin’ny famoriana olona sy fanaovana hetsika izay miova amin’ny didy hitsivolana n°62-017, ny 14 aogositra 1962. Toy izany ny famoahana ny tetiandro amin’ ny fifidianana ny lehiben’ny faritra, fa fepetra tsy maharitra ny fanendrena governora.
Ankoatra izany, eo ny fanalalahana ny fahafahana mampiasa ny haino aman-jerim-panjakana; laharam-pahamehana ny fametrahana ny lalàna ny fahafahana misitraka ny vaovao ho an’ny rehetra ary ny fiarovana ireo mpiaro ny zon’olombelona sy mpisintona lakolosy; ny fampiharana ireo sosokevitra avy amin’ireo fitsirihana sy fanaraha-mason’ny firaisamonina sivily sy antoko politika; ny fametrahana fifampiresahana ho fampitoniana; ary ny fandraisana andraikitry ny fitsarana manoloana ireo fandikana lalàna amin’ny fifidianana.
R. Nd.
French