Filohan’ny Sénat tany Maroc : niantso ny mpampiasa vola ho aty Madagasikara

Nahazo fanasana manokana hanatrika ny fihaonamben’ny filohan’ny Antenimie­randoholona avy aty Afrika sy i Amerika Latinina ary ny vondron-tany arabo, izay natao tany Rabat, Maroc, afakomaly ary nifarana omaly, ny filohan’ny Antenimierandoholona, ny jeneraly Ravalomanana Richard, nitarika ny delegasiona malagasy nahitana ny kestoran’ny Antenimierando­ho­lona, ny loholona Fernand Eddie Serge. Tanjona ny fa­namafisana ny fiaraha-miasa eo amin’ny samy firenena avy aty amin’ny ilambolan-tany atsimo. Firenena 40 no nandray anjara tamin’izany. Lohahevitra nifantohana ny fiaraha-miasan’ireo firenena avy aty amin’ny ilambolan-tany atsimo, ny anjara asan’ny parlemanta nasionaly sy rejionaly ary kaontinantaly eto Afrika, ao anatin’ny vondron-tany arabo sy ny any Amerika latinina amin’ny fampiroboroboana ny fiaraha-miombon’antoka ara-stratejika sy ny fanatrarana ny fampandrosoana iombonana.
Kabarin’ny jeneraly Rava­lomanana ny maha zava-dehibe ny fihaonana. Ho fanamafisana ny diplaomasia parlemantera, anisan’ny fanoitra hitadiavana fampandrosoana iombonana. Mba hiakaran’ny harinkarena faoben’ny isam-pirenena sy hampisy filaminana maharitra izany. Eo koa ny fampirisihana ny mpandraharaha ara-toekarena ho tonga hampiasa vola eto Madaga­sikara. Sehatra maro no azo hiaraha-miasa amin’i Madaga­sikara, araka ny nambarany. Eo, ohatra, ny fizahantany, ny fitrandrahana harena an-kibon’ny tany manaraka lalàna, ny indostria, ny fambolena, ny hai­tao vaovao… Misokatra amin’ izao tontolo izao i Madagasikara.

R. Nd.