Avy any Dubaï dia nihazo an’i Addis Abeba, Ethiopie indray ny filoha Rajoelina sy ny delegasiona miaraka aminy. Namonjy ny fivoriambe faha-37-ny Vondrona Afrikanina, ny 17 sy 18 febroary izao.
Hanomboka, anio, atsy Addis Abeba, Ethiopie, ny fivorimbe faha-37 ataon’ny Vondrona Afrikanina (UA). Omaly no tonga any an-toerana ny delegasiona malagasy, tarihin’ny filoha Rajoelina. Maro ny firenena afrikanina mbola miaina ady an-trano, tsy fandriampahalemana, anjakan’ny asa fampihorohoroana. Anisan’ny tanjona amin’izao fivoriambe izao ny fidiran’ny UA an-tsehatra
amin’ny famahana izany olana izany. Valo ireo laharam-pahamehana, hijerena vahaolana manokana amin’izao taona 2024 izao. Anisan’izany, ohatra, ny fifehezana kokoa ny fihemoran’ny demokrasia, ny firotsahana amin’ny famonjena an’i Soudan, ny fifanampiana hisian’ny fitoniana any Ethopie, fisorohana ny mety ho fifandonana eo amin’ny Repoblika demokratik’i Congo (RDC) sy i Rwanda. Eo koa ny fanomezana aina ny diplaomasia any Sahel afovoany, taorian’ny fametraham-pialan’i Niger sy i Burkina Faso ary i Mali tao anatin’ny fifanarahana Sahel, ny fitadiavam-bahaolana amin’ny ady any Cameroun, fanatsarana ny fiaraha-miasan’ny UA any Somalie, fanampiana an’i Soudan Atsimo hisian’ny fitoniana ho amin’ny fanatanterahana fifidianana.
Ny filohan’i Mauritanie, i Mohamed Ould Ghazouani, no mitarika ny UA mandritra ny herintaona, handimby ny filohan’i Kaomoro, i Azali Assoumani. Amin’izao fivoriana izao no hanaovana ny famindram-pitantanana eo amin’izy ireo. Hifarana rahampitso ny fivoriana.
Ankoatra ny fiatrehan’ny filoha malagasy izany, eo koa ny fihaonany amin’ireo tomponandraiki-panjakana ambony tonga any an-toerana.
R. Nd.
French