Tetikasa goavana hanavao sy hanatsara ny sehatry ny angovo eto Madagasikara no hotanterahina manerana ny Nosy ao anatin’ny zato andro.
Anisan’ireo andry telo lehibe iankinan’ny Politika ankapoben’ny fanjakana ny sehatry ny angovo. Ankehitriny, tafapetraka avokoa ireo tetikasam-panjakana hanatsarana ny sehatry ny angovo izay hotanterahina eto Madagasikara, mandritra ny 100 andro. Andrasana ny fahatongavan’ny ampahany voalohany amin’ireo fitaovana ho an’ny fampivadiana (hybridation) an’ireo tobin’ny Jirama miisa 47 miparitaka manerana ny Nosy. Fitaovana izay hananganana ireo tobim-pamokarana herinaratra mandeha amin’ny masoandro izay mitotaly 300 “containers”. Imasoana ny drafitrasa fampiakarana avy any Toamasina ireo milina vaventy hampiodinana ny tobim-pamokarana herinaratra mandeha amin’ny solika (centrale thermique) hanana tanjaka 105MW ao Ambohimanambola.
Ankoatra izay, tanàna 47 any ambanivohitra no hisitraka herinaratra ao anatin’ny 100 andro, amin’ny alalan’ny teknolojia «mini grid solaire» sy «nano réseau solaire» no hamokarana ny angovo. Hiasa tsy ho ela ihany koa ny tobim-pamokarana angovo azo avy amin’ny masoandro 1MW ao Sainte Marie. Hanaraka tsy ho ela kosa ny 1,5MW ao Mananara avaratra.
Fampitaovana
CSB 453 sy tobim-pahasalamana any ambanivohitra no hisitraka “kits solaires” hoentina hamatsiana ny herinaratra ao an-toerana. Mbola hitohy ny fametrahana jiro hanazava ny lalana sy ny lalambe miisa 1 500 izay hapetraka manerana ny Nosy. Tokantrano miisa 200 000 koa hisitraka «kits solaires domestiques» ao anatin’ny tetikasa “hazavana ho anao” mandritra ny 100 andro.
Tokantrano 50 000 afaka hisitraka herinaratra amin’ny alalan’ny tetikasa “branchement mora” hanamorana ny fahazoana herinaratra ho an’ireo tokantrano ao anatin’ny 30m miala ny tambajotra mpitsinjara herinaratry ny Jirama.
Henintsoa Hani
French