Fiara Sprinter iray no nivadika teny Tsaramanga Ambatofotsy, omaly. Olona 12 no tao anatiny ka ny fito tamin’ireo naratra. Nandeha mafy ilay fiara ka tsy nahafehy ny familiana ny mpamily, nivoaka ny lalana ny fiara, raha ny tatitra nampitain’ny zandary. Nentina namonjy toeram-pitsaboana ireo naratra. Na teo aza anefa izany, tsy nisy ny aina nafoy.
Voasambotry ny polisy miasa ao amin’ny CSP1 Tanambao fahadimy Antsiranana, ny sabotsy teo, ny raim-pianakaviana iray nanolana ny zanany vavy 17 taona. Nisy fitarainana voarain’ny polisy mombana tranga fanolanana ny zoma teo. Nanokatra fanadihadiana ny polisy ka niafara tamin’ny fahatrarana azy. Mitohy ny famotorana ao amin’ny kaomisaria.
Tratra ny jiolahy roa nangalatra fiarabe mpanangom-bokatra nihazo ny tanànan’i Marolaona Tsiroanomandidy, ny sabotsy teo. Ireo miaramila nanao fisafoana tao Soavinarivo Tsiroanomandidy no nahatratra azy ireo niaraka tamin’ny fiara. Nentina natao fanadihadiana avy hatrany izy ireo. Niaiky ny heloka vitany ry zalahy nandritra ny famotorana azy.
Niharan’ny fanafihan-jiolahy ny vehivavy iray mpivarotra ao Ambolomadinika Toamasina, ny alarobia teo. Jiolahy roa no tompon’antoka tamin’izany, nifanome tanana tamin’ny fanenjehana azy ireo ny manodidina. Tratra ny jiolahy iray niaraka tamin’ny sabatra. Tafaporitsaka kosa ny namany iray nitondra ny kitapon’ilay vehivavy.
French