Manana ny teny malagasy ny Malagasy. Mankalaza ny andro iraisam-pirenena ho an’ ny teny ibeazana ny Malagasy… Saingy, ny voalohany malaza tsy ampiasaina, ny faharoa ny fihetsiketsehana no betsaka. Misy olona na vondrona olona mikendry ny hamotika tanteraka ny teny malagasy eto. Anisan’izany ireo minia mikipy manoloana ny tena zava-misy marina sy manjo ary iainan’ny teny malagasy.
Nahoana no beazina amin’ ny teny vahiny ny taranaka malagasy ? Isan-tsehatra, tratran’io avokoa. Any anivon’ny ankohonana, toeram-pianarana. Any amin’ny tontolon’ny asa… Ny fiarahamonina iray manontolo mihitsy ! Vao any am-bohoka, omena anarana amin’ny teny vahiny. Teraka, tezaina sy beazina amin’ny teny vahiny. Any an-tsekoly, omena fahalalana sy beazina amin’ny teny vahiny !
Heverin’ireo ampahana Malagasy tia milohaloha vahiny fa rehefa miteny ny fitenin’ ireny olona ireny dia « ambony, avara-pianarana, mihaja sy be voninahitra… » ! Tsy mby ao an-tsain’izy ireo fa fanimbazimbana sy fanaovana tsinontsinona azy sy ny taniny ary ireo razana nipoirany ny fihetsika tahaka izany. Famonoana tanteraka ny hasina maha olona.
… Hipetraka ho fihetsiketsehana sy endrika ivelany fotsiny ny « Andro iraisam-pirenena » raha mbola milohaloha tenim-bahiny, fombam-bahiny, sns, ny Malagasy !
HaRy Razafindrakoto
French