Araka ny fanazavana nentin’ny kaominina Toamasina, hanomboka amin’ny volana marsa ny fifantenana ireo olona hisitraka ny fandidiana sy fitsaboana ataon’ireo dokotera ao amin’ilay sambo Mercy Ships. Haharitra 2 volana eo ho eo ny fifantenana hamaritana mazava ny soritraretina sy ny fitsaboana tokony hatao.
12 ireo tanàna hanatanterahina ny fisoratana anarana ho an’ireo maniry hisitraka ny fitsaboana. Anisan’izany ny eto Analamanga, Toamasina, Vavatenina, Brickaville, Amparafaravola, Miarinarivo, Maevatanana, Ambilobe, Antsohihy, Morafenobe, Ihosy ary Manakara. Ho fantatra miandalana kosa ny toerana sy ny daty hanatanterahina izany.
Nokendrena aparitaka amin’ny faritra ny fisoratana anarana mba tsy hanavesatra ny marary ny fivezivezena sy ny vola mivoaka. Voalaza fa maimaimpoana avokoa ny fandidiana ny marary sy ny fanaraha-maso.
Efa maro ireo tsindrindaona amin’ny fitsaboana hotanterahin’ireo dokotera an-tsambo miantsona ao Toamasina. Maro ireo efa nisitraka ny fandidiana tamin’ny fotoana nandalovany teto, indrindra ireo nanana fivontosana tsy fantatra antony tamin’ny vatana.
Na ankizy na olon-dehibe dia raisina an-tanana raha tafiditra anatin’ny sokajin’aretina afaka karakarain’ireo mpitsabo.
Tatiana A
French