Natao sonia omaly 27 febroary ny fifanarahana fiaraha-miasa eo amin’ny minisiteran’ny Rano sy ny fanadiovana ary ny fidiovana (MEAH), notarihin’ny minisitra Ravokatra Fidiniavo, sy ny ONG Welthungerhilfe (WHH). Fifanarahana miompana amin’ny fanatsarana ny fomba fitantanana ny fako, ao anatin’ny tetikasa “Passat-4”. Tohin’ny efa nataon’ny ONG WHH nanomboka ny taona 2014 ity atao ity, tohanan’ny minisiteran’ny Fiaraha-miasa sy ny fampandrosoana ara-toekarena (BMZ) alemà.
Tanjona ny hanalefahana ny fiantraikan’ny fiovan’ny toetr’andro. Manohana ao anatin’ ny tetikasa Passat-4 ny MEAH, vatsian’ny BMZ ara-bola.
Andraikitry ny WHH ao anatin’ity fifanarahana ity ny fanamafisana ny fahaiza-manaon’ny mpiasan’ny MEAH, ny fanohanana ny kaominina amin’ny fanangonana sy ny fanarahana ny antontam-baovao mahakasika ny fako. Eo koa ny fanentanana ny daholobe amin’ny fitantanana ny fako sy ny fiarovana ny tontolo iainana.
Manana andraikitra hizara ny filàny amin’ny fahaiza-manaony ny MEAH, hanamorana ny fananganana ny vaomieran’ ny fidiovana isan-tsokajiny. Sady hanampiana ny fampiharana ny tondrozotra Madagasikara madio an-tanàn-dehibe 2030 sy ny toro-lalana CMH. Anisan’izany ny hamolavolana ny fenitry ny fitantanana ny fako, sy hanamorana ny fifandraisana amin’ny mpiara-miombon’antoka.
Njaka A.
French