Naseho omaly, tetsy Anosy, ireo fitaovana avy amin’ny fikambanana Imaso Ivoho Madagasikara. Izay enti-manentana ny mpisehatra rehetra eny anivon’ny sekoly, manoloana ny herisetra. Anisan’ny naseho teny an-toerana ihany koa ny horonantsary “le carnet”, notontosain-dRasoanaivo Anjamamalala, mpanatontosa. Entina hanehoana ireo karazana herisetra an-tsekoly amin’ny endriny maro sy ny fiampitan’izany amin’ny fidorohana zava-mahadomelina. Ahitana ny resadresaka natao tamin’ny mpitsabo manazava mahakasika ny fiankinandoha koa. Hita ao anatin’izany ny fijoroana vavolombelona nataon’ny olona niharany sy nampiasa ary nidoroka zava-mahadomelina tany an-tsekoly. Manampy ny fitaovana ny sary miaina ho an’ny ankizy ary ny hira hoe: “Mitsangana”. Vondron’olona tiliana ireo ankizy maherin’ny 14 taona sy ny ray aman-dreny. Mba hahafahan’izy ireo miaro ny zanany manoloana ny herisetra any an-tsekoly. Tafiditra ao anatin’ny tetikasa “Fitaratra”, na ady amin’ny herisetra an-tsekoly sy ny fidorohana zava-mahadomelina, ny hetsika.
Hozaraina maimaimpoana amin’ny sekoly miankina sy tsy miankina amin’ny fanjakana ny fitaovana. Hisitraka izany ny sekoly 60 eto Antananarivo sy ny manodidina ary ny any amin’ny faritr’i Toamasina, Mahajanga, Antsirabe. “Raha izahay no mijoro eny anivon’ny sekoly rehetra dia tsy handaitra mihitsy ny fanentanana ataonay”, hoy Rasoanaivo Anjamalala, sekretera jeneralin’ny fikambanana Imaso Ivoho. Antony nahatonga azy ireo namokatra ny fitaovana.Tanjona ny hiadiana amin’ny herisetra an-tsekoly.
Mino
French