Tontosa ny fifanaovan-tsonia fifanarahana. Havaozina mba hisarika mpizahatany bebe kokoa ny Pic Saint Louis, harembako-pirenena mampiavaka ny faritra Anôsy.
Ny kolontsaina no fanoitra ho an’ny fampandrosoana. Voamarina izany rehefa misy tetikasa mipaka eny ifotony, mitondra fivoarana ho an’ny mponina sy ny fiarahamonina. Anisan’ireny ny fanavaozana izay entina ao amin’ ny Pic Saint Louis any Taolagnaro, faritra Anôsy. “Toerana voasokajy ho harembako-pirenena izy ity. Ny fanavaozana izay hatao dia hisy fiantraikany amin’ny fizahantany ka hipaka amin’ny fidiram-bolan’ny mponina”, hoy ny fintina nataon-dRazafiarison Francis, tale jenralin’ny kolontsaina eo anivon’ny minisiteran’ny kolontsaina sy ny serasera, omaly.
Tontosa tetsy amin’ny Ivokolo Analakely mantsy ny fifanaovan-tsonia ny fifanarahana, mariky ny fiaraha-miasa eo amin’ny minisitera, ny faritra Anôsy ary ny tetikasa “Pôle integré de croissance, ny PIC”. “Fiarovana, fikajiana ary fanomezana lanja ity harembakoka ity no tanjona. Amin’ny alalan’ny fametrahana ny fitantanana mirindra sy maharitra ary eken’ny rehetra, ara-drariny ny toerana ary ny fanamboarana fotodrafitrasa manara-penitra, izany. Fanomezana toerana ny kolontsaina eo amin’ny fizahantany izany”, hoy ny avy amin’ny tetikasa PIC.
Hisy sori-dalana (circuit) 3 hohajariana, ka atao arakaraka ny sokajin-taona sy ny herim-batan’ireo mpizahatany hihanika ny Pic St Louis izany. Mahatatra 600 metatra mantsy ny haavon’ity tendro ity. Ankoatra ny tohatra sy lalana, hisy toeram-pakana aina maromaro amin’ireo lalana ireo. Mahatratra 500 000 Euros ny famatsiam-bola avy amin’ny tetikasa PIC, fanamby goavana ho an’ny telo tonta, araka izany, ny fanatontosana azy ity.
“Inona ny idiran’ny kolontsaina amin’izany? Toerana manana ny hasiny, vohitra masina ny Pic St Louis. Misy fanahy, mirakitra tantara. Kolontsaina izany ary izay aloha no nahafantarana an’i Tolagnaro. Kolontsaina velona ary kolontsaina hamelona no vina hapetraka”, hoy kosa ny fanamafisana nataon’ny minisitry ny Kolontsaina sy ny serasera, Andriamananoro Augustin.
Zo ny Aina
French