TARATRY ny KANTO

Tanterahina manomboka anio hatramin’ny 10 marsa 2024, eny amin’ny Lapan’ny Tanàna Analakely, ny “Artistes au natur’elles”. Fam­pirantiana manasongadina ny faniriana sy ny filana hampiroborobo ny tantara, ny tontolo ary ny nofinofin’ireo vehivavy mitondra avo ny lokon’ny zavakanto eto Madagasikara.
Atrikasa mahakasika ny “Hachures”, izay anisan’ny fototry ny fanaovana sary, no atrehin’ireo Mpanabe kanto, miofana eny amin’ny Tranomboky monisipaly Analakely, Tetikasa “Kanto Manabe” amin’izao. Aorian’ny fiofanan’izy ireo, hiparitaka manerana ny tranomboky eto Antananarivo sy ny sekoly maro izy ireo hampiofana.
Mitohy hatrany ny hetsika ara-javakanto ho fanohanana an’i Mikakely. Anisan’izany ny hotanterahina anio, manomboka amin’ny 2 ora tolakandro, eny amin’ny M’lam Manakambahiny. Seho iarahana amin’Jean Rigo, Eusebia, Martin Le Jaguar, Ziko, Le Seul, Lasdah, Faraingo, Sendie ary Bandy Mlam.
Anio, eny amin’ny Piment Café Behoririka, ny fotoan-dehibe ho an’ny mpankafy an’i Silo sy Mafonja. Firaisan-tsehatra anisan’ny miavaka izy ity noho i Silo sy Mafonja mpahay kanto samy manana ny maha izy azy. Ho re eny an-toerana indray, araka izany, ny hira nahafantarana ireto mpanakanto roa ireto toy ny “Rimorimo”, “Angivy”, “Soleil”, …