Nikarakara fivoriana ampitain-davitra ny masoivohon’i Royaume-Unis eto Madagasikara, David Ashley, ny 22 febroary teo. Noresahina ny tombony hidiran’i Madagasikara ao anatin’ny Faritra fifanakalozam-paritra malalaka aty amin’ny kaontinanta afrikanina (ZLECAF).
Niaraka nikarakara tamin’ny masoivoho britanika ity fivoriana ity ny vondrona mpandinika « Overseas Development Institute » (ODI), manana ny foibeny any Londres. Nandray anjara ny minisitry ny Raharaham-bahiny malagasy, Rafaravavitafika Rasata, ireo mpiasam-panjakana ambony avy amin’ny minisitera voakasika, ny solontenan’ny mpisehatra avy amin’ny tsy miankina malagasy ary ny vondrona iraisam-pirenena.
Nisy ny tatitra mahakasika ny fikarohana nataon’ny ODI, vatsian’ny masoivoho britanika ara-bola. Eo koa ny tombontsoa sy ny fanamby hapetraka amin’ny fidiran’i Madagasikara anaty ZLECAF. Anisan’ireo firenena fito tsy mbola nankatoa ny fifanarahana isika, na dia efa nanao sonia ny ZLECAF aza. Voalaza ao anaty tatitra fa hitombo hatrany amin’ny 10 tapitrisa dolara ny fanondranan’i Madagasikara entana any ivelany, ary ho tafakatra 4 tapitrisa dolara ny fanafarana avy any ivelany, raha tafiditra ao anatin’ity tsenam-paritra ity isika.
Hampandroso ny fizahantany
Hanokatra tolotra tsena vaovao koa ity tsenam-paritra ity. Toy ny sehatry ny fitaterana, ny fiantranoana ary ny fizahantany. Mila mampitombo bebe kokoa ny fotodrafitrasany amin’ny lafiny kojakoja sy ny manodidina izany i Madagasikara, ka tokony hahena ny saran’ny tolotra niomerika.
Nilaza ny tomponandraikitra teknikan’ny fandaharanasa Supporting Investment and Trade in Africa (SITA), izay tohanan’ny governemanta britanika, fa « vonona hanohana ireo governemanta amin’ny fifampidinihana sy ny fanatanterahana ny ZLECAF ny SITA. Mihevitra izahay fa tena hanampy amin’ny fampandrosoana an’i Madagsikara ny ZLECAF. Hanampy azy amin’ny fandraisana fanapahan-kevitra mazava ny fikarohana nataonay, hahazoana tombontsoa maro hanatrarana ny fanamby hapetraka ».
Njaka A.
French