Eny, mbola misy ny mpampiasa ny kapila mangirana. Mazava loatra fa mbola maro koa ny mpanao piraty, araka izany. Porofon’izany, nisy ny fandorana kapila hosoka miisa 16 447, izay nataon’ny Brigady manokana misahana ny ady amin’ny piraty na ny BAP, ny alarobia teo, teny Andohatapenaka. Kapila nogiazana nandritra ny taona 2023 izy ireo. Mpanao piraty miisa 86 no tratra nanao izany ka efa natolotra ny fampanoavana. Saika teto Antananarivo no betsaka tamin’ireo tratra, izay manamarina fa eto ihany ny atidohan’ny mpanao piraty mamatsy faritra maro.
“Voasokajy ho halatra sy fandrobana ny hosoka hatao amin’ny sanganasan’ireo mpanakanto, na inona na inona endriny”, hoy ny nambaran’i Tonton Pà, mpanakanto mpamorona, mpikambana ao amin’ny Filankevi-pitananan’ny OMDA. Anisan’ireo nanatrika ny fandorana ireo kapila hosoka teny an-toerana izy sy ny mpitanana ao amin’ity Ofisim-pirenena misahana ny zon’ny mpamorona. Mifampiankina mantsy ny OMDA sy ny BAP ka matetika misy manafangaro ny asa aman’andraikitr’izy ireo.
Mihena ny isan’ny kapila dorana sy ny isan’ny mpanao hosoka voasambotra. Mihena ny mpampiasa kapila ny antony , satria efa manaraka ny rivotry ny teknolojia vaovao ihany koa ny fanaovana hosoka amin’izao fotoana izao. Mihamafy manaraka izany ny asan’ny BAP, araka izany. Anisan’ny mafy indrindra ny ady amin’ny piraty ana habaka.
Zo ny Aina
French