Fampirantiana haikanto: maro ny hetsika manome lanja ny vehivavy

Ankoatra ireo any amin’ny sehatra hafa, mikarakara hetsika maro, entina mankalaza ny andron’ny vehivavy koa ny vehivavy mpahay kanto. Anisan’izany ny fampirantiana hosodoko sy asa soratra, izay samy vehivavy avokoa no manao azy.

Miranty eny amin’ny Lapan’ny tanànan’ Ana­­lakely, nanomboka omaly hatramin’ny 10 marsa 2024, ny asa tanan’ireo vehivavy mpahay kanto mpanao hosodoko. Mandritra ny fampirantiana « Natur’elles » no ahitana izany. Tafiditra ao anatin’ny andron’ny vehivavy izy ity. Tanjona amin’izao ny hanehoana ny zava-bitan’ny vehivavy. Vehivavy manana ny maha izy azy maro, eo amin’ny tontolon’ny haikanto no aseho anatin’ny hosodoko, mandritra ity fampirantiana ity.
Sary maro samihafa no mandravaka ny Lapan’ny tanànan’Analakely, nanomboka omaly. Hita ao avokoa ny sarina vehivavy sangany eo amin’ny tontolon’ny dihy, slam, haisoratra, haikanto plastika, teatra ary mozika. Niangaly ny hosodoko maneho ny sarin’izy ireo kosa ireo vehivavy mpanao hosodoko sy sary, sahala amin’i Dalia Marillier, Michella Ravelo­arisoa, les sœurs Rama­nindry, Faniry Ramampy, Jou talents, Caylah, Dina Miali­nelina, Sleeping pop, Julie Iarisoa, Ange Ralaiheili­narivony, Belly Sid,Vony Ra­nala ary Môta Soa. Fam­pirantiana mampisongadina ny talentan’ireto vehivavy mitondra avo ny lokon’ny zavakanto eto Madagasikara ny “Natur’elles”. Amin’ny alalan’ireo sary ireo no anehoan’izy ireo ny fihetseham-pony momba ny asany, ny faniriany, ny nofinofiny…
Ankoatra ny eny amin’ny Lapan’ny tanànan’Antana­narivo, hisy ihany koa ny eny amin’ny Tranomboky monisipaly Analakely, iarahana amin’ny “ligue des femmes écrivaines de Madagascar” (LFEM), ahitana ny asa soratr’i Na Hassi, Elina Raza­nadriaka, Ravaka Mihamina ary Ando Voniary. Mandritra ny hetsika no ahitana ny asa soratra maro samihafan’ireo mpanoratra ireo. Fotoana ihany koa ahafahana manjifa ny asa soratr’izy ireo.

Lin