Hifamotoana, anio, etsy amin’ny efitrano malalaky ny Aro Antsahavola ny Sehatra Bagasy (SBG). « Atrikefa bagasy », hizarana ny sanganasan’ireo mpamoron-kira hohiraina mandritra ilay fampisehoana « Redombe bagasy », hotanterahina ao amin’ny CCEsca Antanimena, ny 25 mey ho avy izao. Fampisehoana an-tsehatra lehibe ho an’ny tontolon’ny bagasy ny « Redombe bagasy », raha tarafina amin’ireo mpanakanto (anisan’ny mpihira, mpitendry zavamaneno… Ny traikefa ananan’izy ireo) handray anjara amin’izany.
9 marsa, hotohizana avy hatrany amin’ny « Zarasehatra bagasy », ny fandaharam-potoana SBG, ka i Tahiry Pazzapa no hizara ny traikefany amin’io fotoana io. « Santatry ny fandraisana anjaran’ny Sehatra Bagasy avy any Antsirabe ity seho ity. Hiangaly ireo hira bagasy taloha sy ankehitriny izy ireo », hoy Ratefiarison Lydie, filohan’ny SBG.
Tafiditra anatin’ny fanomezana hery sy hasina ary lanja lehibe ny bagasy ny fanatanterahina ny « Redombe bagasy ». Kendren’ny mpikarakara amin’izany ny hivelaran’ny bagasy ka hipaka hatrany amin’ny ankizy sy ny tanora ny momba azy (tantaran’ny bagasy, tantaran’ny mpihira sy ny mpamorona…).
HaRy Razafindrakoto
French