TARATRY ny KANTO

« Namana sy mozika » etsy amin’ny CCEsca Antanimena. Fiarahana an-tsehatra eo amin’ireo tanora mpanakanto, mpihira sy mpitendry, izy ity, anio, manomboka amin’ny 3 ora. Hamerina ny hiran-dry Bruno Mars, Mahaleo, Goldman, Kiaka, Coldplay, Nanie, Jazon Miraz, Tarika ‘Zay, Tina Turner, Eric Manana, sns, izy ireo. Amin’ny fomba hanaovan’izy ireo azy.
Apost, ao amin’ny Kudeta, Carlton Anosy. Elaela no tsy niaka-tsehatra ny tarika. Fotoana iray ifanomezan-dry Abass sy ny tariny amin’ny mpankafy indray ity anio ity, manomboka amin’ny 8 ora alina. Hamerina ireo hira nahafantarana ny tarika, ankoatra ireo hira nanamarika manokana ireo mpikambana, izy ireo.
Miteraka vokatra maro samihafa ny “cover”, raha ny nambaran’ireo manampahaizana manokana momba ny hira sy ny fivoarany. Mety hampivelatra ny tompony. Na koa mety hampanan-danja ny mpamerina. Tsy azo odian-tsy hita anefa fa mety handray roa. Na izany aza, “mety tsy hampitombo ny isan’ny hira vaovao ny “cover”. Mety hampalaina ny mpamorona koa”, hoy ireto manampahaizana.
Ankalazaina nanomboka omaly hatramin’ny 8 marsa 2024, ny “7 rallye moi(s) théatre”, karakarain’ny Compagnie Miangaly Théatre. Lohahevitra amin’izany ny hoe “Les femmes et les enfants d’abord”. Atrikasa, fampisehoana ary vaky boky no ho hita mandritra izany.