TSELATRA

Zazalahy menavava hita faty teo amoron-dranomasina atsinanan’ny seranam-piaramanidina Mananjary, omaly maraina. Narian’ny reniny niteraka azy io zaza io, araka ny angom-baovao. Manana olana eo amin’ny fahasalaman’ny saina ilay renim-pianakaviana.
Jiolahy roa lahy maty voatifitry ny zandary tao Ankadinondry, Tsiroanomandidy, afakomaly. Naratra mafy ny mpitondra taxi-moto iray vokatry ny asan-jiolahy tao amin’ny fokontany Imehy, kaominiina Ambanivohitra Sakay, ny 6 janoary teo . Lasan’ny jiolahy ny moto ka nanao ny fikarohana ny mpitandro filaminana. Tratra ireo nahavanon-doza ary izao lavo izao.
Zaza mpianadahy namoy ny ainy nihotsahan’ny tany tao Ambohitrimanjaka, omaly. Vokatry ny ora-nikija, nianjera tampoka ny tamboho lehibe iray tao amin’ny fokontany Miadana. Trano iray voatery narodana ho fisorohana ny loza.
Nidoboka am-ponja ireo roa lahy nanolan-jaza 16 taona tao Vinaninkarena Antsirabe, afakomaly. Nosaritin’izy roa lahy ilay vehivavy tamin’ny fotoana nitsenany ny reniny. Notapenan’ireo tsy valahara ny vavany ary nanamparany ny filan-dratsiny.