Kitra – EGBM: Sekoly hanofana ankizy ho lasa mpiandry tsatoby

Sambany hisy ny sekoly manofana mpiandry tsatoby eto Madagasikara. Hisoka­tra manomboka ny sabotsy 9 marsa ho avy izao, etsy amin’ ny Kianja synthètique Beton­golo ny Ecole de gardien de but de Madagascar (EGBM). Nanangana izany, Rasolofo­niaina Pascal Ho­noré, mpiandry tsatoby tao amin’ny USJF Ravinala teo aloha ary efa nandrafitra ny ekipam-pire­nena. Antony na­nosika azy hanao izany ny hampita ny fahaizany ary indrindra ny fa­hatsapany fa sahirana na klioba na ekipa nasionaly amin’izao fotoana izao, amin’ny mpi­andry tsatoby. «Toerana sarobidy ary hiankinan’ny fandresen’ny ekipa iray ny fananana mpi­andry tsatoby mahay, saingy matetika tsinontsinoavin’ny olona», hoy i Noret.
Fiaraha-miasany amin’ireo namana vitsivitsy eto an-toerana sy any ivelany ity tetikasa ity ary misy ivontoeram-piofanana any Marseille, Fran­ce manara-maso akaiky izany. Natokana ho an’ireo ankizy lahy sy vavy latsaky ny 15 taona ma­nam-paniriana te ho lasa mpiandry tsatoby, ny EGBM.
Isaky ny sabotsy manomboka amin’ny 9 ora – 10 ora ny ko­trana ka samy mitondra ny fanamiany sy kahie ary fitaovam-panoratana ny kilonga hiofana. Efatra mirahalahy izy ireo no misahana ny fampiofanana ireo ankizy.
Tanjona ny hamoahana mpiandry tsatoby sady manam-batana no mahafehy tanteraka izany toerana izany. Namba­ran’i Noret fa tsy ho ary vitany samirery ny famolavolana ireo ankizy koa anaovany antso ho an’ireo mpiandry tsatoby ao amin’ny “Pureplay Football League” (PFL), amin’izao fotoana izao.