Ao anatin’ny fifaninanana tanteraka. Na tsy nahazo laharana voalohandohany aza, tsy nitsanga-menatra i Antsaly Rajoelina, miatrika ny “Miss Monde 2023”, nitafy ny vita malagasy.
Voalohany tamin’ny fifaninana “Sport Africa”. Tao anatin’ny 25 voalohany tamin’ny”head-to-head Challenge”. Mbola ao anatin’ny fifaninanana tanteraka i Antsaly Rajoelina, solontena malagasy miatrika ny “Miss Monde 2023”, izay hatao amin’izao fotoana izao, any Inde. Niatrika ny “World Designer Challenge” izy ny sabotsy teo, izay nanehoana ny fitafiana sanganasan’ireo mpamoron-damaody. Tsy tafiditra tanaty laharany voalohany, saingy tsy mena-mitaha amin’ny fitafian’ireo mpifaninana kosa ny nosaloran’i Antsaly, nandritra izany.
Akanjo nampitondraina ny anarana “Barea”, ho fanehoana ilay fampihavanana ny Malagasy nentin’ny ekipam-pirenena malagasy izany. Tsy akanjo fotsiny fa nahitana vakana sy rofia, maneho ny akora malagasy ity fitafiana sanganasan’ny Bogasy Madagascar ity. Manasongadina ihany koa ny vehivavy manokana sy ny Malagasy rehetra maneran-tany ihany koa izany.
Niatrika ihany koa ny “Beauty with a Purpose”, izay nitondrany ny lohahevitra naharesy lahatra azy i Antsaly, omaly. Ny “ady amin’ ny herisetra ara-pananahana atao amin’ny zaza” no nosafidiany manokana, nitondra ny olana sy ny vahaolana amin’izany. Hiditra amin’ny herinandro farany kosa ny fifaninanana “Miss Monde 2023”, manomboka anio. Hanao famerenana ny lanonana famaranana, hatao ny 9 marsa izao, izy ireo. Tsiahivina fa efa nanomboka ny 19 febroary lasa teo ny fifaninanana, ho an’ireo tovovavy misolo tena firenena maro maneran-tany. Tsy misy mpanara-dia i Antsaly Rajoelina fa noraisin’ny komity mpikarakara any an-toerana avokoa ny momba ny fivahinianana. Nikarakara sy nandefa azy kosa ny komity “Miss Madagascar”.
Zo ny Aina
French