Firenena tia sy mora babon’ny fakan-tahaka ny Malagasy. Izay mipoitra any ivelany, arahina avokoa. Mihintsana tsikelikely ny maha izy azy. Voatazona miandalana ny an’ny hafa ka zary miteraka hambo hafahafa !
Andro iraisam-pirenena ho an’ny vehivavy, hono, ny omaly. Rehefa mety hanehoana ny «lanjan’ ny vehivavy» eo amin’ny fiarahamonina, natao avokoa. Mialoha sy aorian’ny 8 marsa, foto-kevitra maro no efa naparitaka tamin’ny fomba maro (Haino aman-jery, tambajotran-tserasera, fandaharam-pianarana). «Mitovy zo ny lahy sy ny vavy», «ilaina ny miralenta», «tsy fanaka malemy izany intsony ny vehivavy», sns. Ny fivoizana tsy miato ireny hevitra ireny no mamboly toe-tsaina vaovao eo amin’ny vehivavy. Iny ilay ambadika tsy tsapa raha tsy efa mby an-koditra !
Teo amin’ny fiarahamonina malagasy, nifameno ny lahy sy ny vavy. Ny fanabeazana sy ny fitaizana ny taranaka no tena nampiharihary azy io. Fotoana nampisongadina ny dinika amorom-patana sy ny tafa eo andrefan-tanàna. Niitatra nankany amin’ny fihariana izany taty aoriana. Anjaran’ny lehilahy ny manatanteraka ny asa ilaina herim-batana kokoa (miasa tany), an’ny vehivavy kosa ny mikajy ny antsipirihany (miava, manala ny ahidratsy). Tahaka izany hatrany tany amin’ny sehatra maro.
Ilaina tohizana ny fifamenoina
«Ireo lehilahy ireo…», «vitantsika ny vitan’ireo», sns ! Noraisin’ny vehivavy ho fahavalo ny lehilahy. Matetika aza, napetrany ho mpifaninana aminy ny lehilahy. Tsy tazana loatra intsony ilay fifamenoana. Ankehitriny, mipoitra etsy sy ero ny hoe «lehilahy resim-bavy». Fa angaha moa natao hifampitana hery (bika, endrika, fampidiram-bola, andraikitra tazonina…) ireo ?
Lamina voajanahary ny fifamenoana eo amin’ny lahy sy ny vavy. Hain’ny Malagasy izany na nisy ny 8 marsa na tsia. Tsy hanana tanjona hanamafy azy io ny vahiny. Ny handravana izany aza no katsahiny mafy mba tsy hampatanjaka ny fiarahamonina malagasy !
HaRy Razafindrakoto
French