Naneho ny heviny momba ny famoronana distrika vaovao, ny filoha nasionalin’ny Otrikafo, Rabevahiny Elia. Nambarany fa tafiditra anatin’ny kajikajy politikan’ny mpitondra fanjakana, izay mitady ny maro anisa eo anivon’ny Antenimierampirenena izany. “Manao ny fomba rehetra hahazoana an’izay ry zareo. Anisan’izany io fanokafana ny distrikan’Antanimora Atsimo io”, hoy hatrany izy. “Tamin’ny fotoana tsy mbola nahafantarana sady tsy namoahana ny datim-pifidianana solombavambahoaka hoe amin’ny 29 mey no namoahana an’izay distrika vaovao izay. Eo ny kajikajy politika, hany ka tonga hatramin’ny hoe efa mivoaka ny datim-pifidianana ary antomotra ny fifidianana vao avoaka ny fisian’ ny distrika vaovao. Izany hoe, tampohina fa tsy ho tafaomana amin’izany ny sehatry ny fanoherana, fa tsy maintsy ry zareo ao anatin’ny fanjakana ihany no efa mahafantatra sy efa miomana amin’izay lafiny izay.’, hoy izy.
Betsaka ireo kaominina maromaro mitambatra no tokony hahazo distrika eto Madagasikara. Mba tokony hatao amin-kitsim-po ny fanaovana ny resaka. Amin’ny vanim-potoana tsy mbola iheverana fifidianana no tokony ho efa nodinihina izany. “Raha atao toy izao ny raharaha, hita be hoe tahotra ny tsy hahazoan’ny mpitondra fanjakana maro anisa eny anivon’ny Antenimierampirenena no amoahana distrika vaovao toy izao”, hoy izy namarana ny fifampizarana.
R. Nd.
French