Laharam-pahamehan’ny fanjakana ny fizarana karatany ho an’ny Malagasy manerana ny Nosy entina hampandrosoana ny firenena. Karatany 6 987 no voazara ho an’ny mponina tao Toamasina II, ny faran’ny herinandro teo.
Mitohy hatrany ny hetsika fizarana karatany sy bokin-tany ataon’ny fitondram-panjakana manerana ny Nosy. Anisan’ny nisitraka ny tetikasa ny faritra Atsinanana. Tonga tany an-toerana, ny sabotsy teo, ny filoham-pirenena, Rajoelina Andry, sy ny minisitry ny Fitsinjaram-pahefana sy ny fanajariana ny tany, Andriantsitohaina Naina, nizara karatany 6 987 isa. Nisitraka izany ny tanànan’i Betainomby, Tanandava ary Ambalamanasy. Hetsika izay tafiditra indrindra amin’ny fanomezana bokin-tany 50 000 sy karatany 2 000 000 manerana an’i Madagasikara sy hanomezan-danja ny vehivavy. Tanjona, araka izany, ny hahafahan’ny Malagasy misitraka ny taniny ka hitondrany anjara biriky amin’ ny fampandrosoana ny firenena. “Haverina amin’ny Malagasy ny taniny ary tsy maintsy hitondrana vahaolana ny ady tany rehetra”, hoy ny filoham-pirenena manoloana ny ady tany tao Ambalamanasy. Nilaza izy fa nandraisana fepetra ny raharaha ka naverina tamin’ ireo mponina ny tany ao an-toerana. Nentina nanamarihana izany ny fanomezana karatany sy bokin-tany ho an’ireo tokantrano miisa 445.
Ady amin’ny kolikoly
Hentitra ny fanjakana manoloana ny hala-tany, na ho an’ny tanim-panjakana izany na ho an’ny tanin’olon-tsotra. Nilaza ny minisitra Andriantsitohaina Naina nandritra izany fa “ny ankabeazan’ny fitarainan’ny olona dia mahakasika ny fananan-tany avokoa”. Nambarany, araka izany, fa hisokatra tsy ho ela ny birao handray ny fitarainana ho an’ny faritanin’i Toamasina. Vonona ny hiady ho an’ny vahoaka ny minisiteran’ny Fitsinjaram-pahefana sy ny fanajariana ny tany manoloana ny hala-tany amin’ny endrika samihafa. Ankehitriny, “efa tratra avokoa ny hosoka nataon’ireo izay nilaza ho tompon-tany ka nandroaka ny mponina tao Ambalamanasy ary handraisana fepetra avy hatrany”, hoy hatrany ny minisitra.
Henintsoa Hani
French