Mbola tsy milamina ny disadisa miseho eo amin’ny samy mpino ao amin’ny fiangonana FJKM Betela Tanambao fahadimy ny marainan’ny alahady 10 marsa teo, nandritra ny fotoam-pivavahana. Tamin’ny voalohany, nizotra soa aman-tsara ny fotoam-pivavahana tsy nisy trangan-javatra nampiahiahy. Ny mpitandrina mpanampy mpiandry toerana no nitarika ny fanompoam-pivavahana, satria mbola marary mitsabo tena any amin’ny hopitaly kosa ny mpitandrina tompon-toerana. Akory anefa ny hagagana sy hatairan’ny rehetra rehefa tonga teo amin’ny famakiana ny filazam-baovaom-piangonana fa nisy niakatra avy hatrany nanapaka ny fanamafisam-peo sady nisintona tampoka ny taratasy saika ho vakina. Ny hafa kosa nampiranty sora-baventy izay efa voaomana amin’ny karazan-tsoratra maro samihafa maneho tsy fankasitrahana. Tsy vita moramora kanefa izany rehetra izany fa fifandroritana sy fifampikasihan-tanana no niseho teo amin’ny samy mpino. Vokany, nisy ny naratra, tao ny narary tongotra vokatry ny fianjerana sy fitsoahana tao am-piangonana. Taorian’ izay, nilamina ary afaka niditra ny fiangonana ireo mpianatra sekoly alahady ary nizotra ara-dalàna ihany koa ny fotoam-pivavahana faharoa, izay niditra tamin’ny 8 ora sy 30mn.
Sajo
French