Naiditra am-ponja vonjimaika eny amin’ny fonjaben’i Tsiafahy, omaly ilay lehilahy nisandoka ho Tafika. Olona telo hafa indray nalefa eny amin’ny fonjan’Antanimora noho ny fisandohana asa sy andraikitra (nilaza ho miasa eo anivon’ny Tafika Malagasy). Nitohy hatrany ny fanadihadiana lalina nataon’ny zandary momba ilay raharaha fisolokiana ho miaramila eo anivon’ny Tafika Malagasy. Nanao fanadihadiana lalina, araka izany, ny teo anivon’ny tobim-paritry ny zandarimaria Ambohimalaza. Tao anatin’ny famotorana no nahafantarana ny olona nividianany ny fanamiana an’ny Tafika izay nentiny nisolokiana sy nentina nanaovana fanamparam-pahefana tamin’ireo mpiara-monina. Tsy vitan’izay fa mbola mangalatra ihany koa izy. Olona roa no tratran’ny zandary, ankoatra ireo mpisakaiza voasambotra voalohany. Niroso tamin’ny famotorana azy ireo indray ny zandary ka fantatra, nandritra izany, fa manjaitra sy mivarotra fanamiana an’ny Tafika io orinasakely io. Maro ireo fanamiana fampiasan’ny Tafika, toy ny akanjo, satroka, galona vokarin’io orinasa kely io. Hita ihany koa ny toerana fivarotan’izy ireo izany. Niaiky ny heloka vitany ireto mpisandoka andraikitra ireto nandritra ny fanadihadiana nataon’ ny zandary. Nilaza izy ireo fa tsy vao izao fa efa ela no nanao ity asa ity. Taorian’ny fitondrana ny raharaha teny anivon’ny fampanoavana, naiditra vonjimaika am-ponja ireo voarohirohy.
J.C
French