Fanendahana teo Ampasika : Lehilahy voatsatoka antsy antsy teo amin’ny lohany

Naratra teo amin’ny lohany ny raim-pianakaviana iray notsatohan’ny jiolahy antsy teny Ampasika, omaly. Lasan’ireo mpanafika ny kitapo niaraka amin’ny vola…

Raim-pianakaviana iray hamonjy asa vao ma­raina no niharan’ny fa­nendahana nataon’ny jiolahy telo nirongo basy sy zava-maranitra teny Ampasika, omaly vao maraina. Teo am-piandrasana taxi-be hihazo an’Ivato no tonga nanatona azy ny jiolahy telo sady nanam­bana basy. Notereny hanome ny kitapo nobabeny teny an-damosina miaraka amin’ny finday ity raim-pianakaviana ity. Tsy nanaiky mora foana anefa fa niezaka nanohitra ireo jiolahy izy. Mafy ny fifandonana satria nifampisinto­man’ireo olon-dratsy ilay kitapo. Tsy naharesy tosika azy ireo jiolahy ka voatsatoka antsy teo amin’ny lohany ilay niharam-boina. Naratra mafy izy, lasan’ireo mpanafika ihany ny kitapo misy ordinatera niaraka tamin’ny kojakoja. Tsy vitan’ izay fa mbola nalain’izy ireo koa ny finday miampy ny vola tany am-paosiny. Nitsoaka ny lalana manamorona ny reni­ranon’Ikopa ireo mpanendaka rehefa nahazo ilay kitapo. Soa ihany fa tsy tafalentika lalina ny antsy fa saika zava-doza. Olona tsara sitrapo no nitondra azy namonjy toeram-
pitsaboana. Avotra soa aman-tsara ihany ilay raim-pianakaviana, raha ny loharanom-baovao voaray. Voalaza fa miasa amina orinasa mikirakira momba ny tontolon’ny informatika eny Talatamaty izy. Tsy vao izao fa matetika no ahi­tana trangana tsy fandriampahalemana amin’iny Ampasika sy ny manodidina iny. Ireo mpiasa tratra hariva na ha­monjy asa vao maraina no tena lasibatra.

J.C