Mivoatra hatrany ny tontolon’ny fandefasam-bola eo amin’ny sehatra iraisam-pirenena. Misitraka izany i Madagasikara amin’ny alalan’ny fiaraha-miasan’ny BNI Madagascar sy ny MoneyGram, izay mikendry manokana ny hanamorana ny fandefasana vola any ivelany eto amintsika. “Tombony amin’izao fiaraha-miasan’ny roa tonta izao ny fahazoana vola avy any ivelany, izay azo alaina mivantana eny anivon’ireo masoivoho 111-n’ny BNI Madagascar manerana ny Nosy sy any amin’ny faritra 23 amin’ny fotoana rehetra”, hoy ny fanazavan’ny talen’ny tambajotra BNI Madagascar, Rasoloharijao Fanja, omaly, nandritra ny fanolorana tamin’ny fomba ofisialy ny tolotra tetsy Analakely. Tsotra, mora, azo antoka ary tsy misy sarany ny fangalana ny vola eny anivon’ireo masoivohon’ny banky rehefa voamarina avokoa ny antontan-taratasy takina amin’izany toy ny karapanodrom-pirenena sy ny famenoana ny taratasy hangalana ny vola.
Tombony
Tonga ara-potoana ny tolotra amin’izao firoboroboan’ny tontolon’ny fandefasam-bola maneran-tany izao, izay tafakatra hatrany amin’ny 600 miliara dolara. Noho izany, natao ho an’ny rehetra ny tolotra. Izany hoe, tsy voatery manana kaonty eny amin’ny banky na koa mpanjifan’ny BNI ireo maniry hisitraka izany. Nasongadin’ny tale jeneralin’ny BNI Madagascar, Alexandre Mey, nandritra ny lahateniny ireo tombontsoa azo amin’ny fampiasana ny tolotra sy ny fiaraha-miasan’ny roa tonta amin’ny fanomezana fahafahampo ny mpanjifa.
Henintsoa Hani
French