Tsara ny vokatra azon’ny ekipa malagasy Barea, tamin’ny lalao voalohan’ny “Fenêtre Fifa”. Nahazo fandresena nanoloana an’i Burundi izy ireo.
Notanterahina; omaly, teny amin’ny kianja Barea Mahamasina ny lalao ara-pirahalahiana tafiditra amin’ny “Fenêtre Fifa”, karakarain’ny federasiona malagasin’ny baolina kitra (FMF). Resin’i Madagasikara tamin’ny isa 1 no ho 0 i Burundi. Raha hiverenana ny fihaonan’ny roa tonta, ny baolina tokana tafiditry Raveloson Rayan, kapitenin’ny Barea de Madagascar, teo amin’ny minitra faha-19, fizaram-potoana voalohany, no nitondra ny fandresena ho an’ny ekipa malagasy. Maro ireo baolina tokony ho tafiditra ho an’ny andaniny sy ny ankilany, saingy nidona tamin’ny tsivalamby. Tsy mbola afa-bela tamin’ny Barea, araka izany, ny ekipam-pirenena borondey. Tsiahivina fa resin’i Madagasikara 1 no ho 0 i Burundi, nandritra ny “Can 2019”, natao tany Égypte. Hifanandrina amin’i Rwanda indray ny ekipam-pirenena malagasy, ny alatsinainy ho avy izao, etsy amin’ny kianja Barea Mahamasina ihany.
Nisaraka ady sahala samy tsy nisy nitoko kosa i Rwanda sy i Botswana, teo amin’ny lalao faharoa nikatrohan’izy ireo.
Hoy izy ireo:
“Misy foana ny fanatsarana amin’ny lalao toy ireny. Azo antenaina fa hihatsara izany amin’ny fihaonana faharoa”, hoy Rakotondrabe Romuald Félix, mpanazatran’ny Barea.
“Nivoatra ny filalaon’i Madagasikara. Tsy nitovy tamin’ny 2019 ny endri-dalao nasehon’ izy ireo”, hoy ny kapitenin’i Burundi, Christophe Nduwarugira.
Fitia Randria
French