Efa nanomboka ny fankalazana ny Andro maneran-tany ho fampahafantarana ny autisme ny eto Analamanga. Nisy hetsika fanentanana teny Ambohijatovo sy Anosy, omaly, ho an’ny daholobe ho fiaraha-mientana ahafahana mametraka fiarahamonina manaja ny zon’ireo olona autiste. “Zaza, tanora ary olon-dehibe autiste dia samy mendrika hajaina sy tohanana daholo», hoy ny fanambaran’ny fikambanan’ny Autisme Madagascar. Ny autisme dia anisan’ny fikorontanan’ny toetra miparitaka indrindra. Mialoha ny fahatelo taonan’ny zaza matetika no mipoitra ireo soritra hamantarana azy, hoy ny fanazavan’ny fikambanana. Tsy mitovy ny toetoetry ny olona autiste, toy izay koa ny fitrangan’ny autisme amin’ny olona tsirairay. Misy ihany, amin’ny ankapobeny, hamantarana fa autiste ny zaza iray.
Tanjon’ny fikambanana ny manabe ny fiarahamonina momba ny autisme sy mametraka lalàna miaro ny olona autiste ary ny hisian’ny fandraisana an-tanana azy ireo eto Madagasikara. Mametraka sehatra ahafahana manampy ny fianakaviana sy hifampizarana traikefa koa ny fikambanana. Efa manana sampana any amin’ ny faritra maro (Diana, Matsiatra Ambony, Anosy…) ny Autisme Madagascar ary samy manatanteraka hetsika fanentanana ho an’ny Andro maneran-tany ho fampahafantarana ny autisme izy ireo.
Mibahan-toerana ny fanentanana isan-karazany miantefa amin’ny daholobe.
Vonjy
French