Fahavoazam-pirenena noho ny rivodoza: « Vonona hanohana ny Frantsay », hoy ny masoivohony

Feno ny fepetra hanambarana ny fahavoazam-pirenena taorian’ny fandalovan’ny rivodoza Gamane, araka ny tapaka nandritra ny filankevitry ny minisitra natao ny alarobia lasa teo. Namela takaitra maro ho an’ny faritra avaratra atsinanana

89 645 ny isan’ny traboina ary maro ny fotodrafitrasa simba, toy ny lalana, ny tetezana, ny biraom-panjakana sy ny sekoly. Rehefa misy voina tahaka izao, ilana fa­nampiana amin’ny firenena hafa sy ireo mpiray ombon’antoka mahazatra. “Anio no hanainga ny fanampiana eto Antananarivo ho any Antsira­nana ka hotsinjaraina amin’ny distrika rehetra voakasiky ny rivodoza. Sakafo ho an’ny traboina sy ny olona nafindra toerana mahavita 10 andro no maika”, hoy ny tale je­neralin’ny BNGRC, jeneraly Andriakaja Elack Olivier, omaly, teny Andrainarivo. Miandry ny fiaramanidina avy amin’ny fanjakana frantsay, izay nanambara tamin’ny alalan’ny masoivohony miasa eto amintsika, Arnaud Guil­lois, ny fahavononany hanoina ny antson’ny BNGRC. Ma­hazaka entana 5t io fiaramanidina lehibe io. Ho fanamorana ny fivezivezen’ny mponina, nalefa any amin’ireo toerana misy tetezana tapaka ny zodiac satria andoavam-bola aloha ny fiampitana amin’izao fotoana izao amin’ny fitaovana misy eo an-toerana.
Ao anatin’ny hamehana ny fanjakana (BNGRC sy ny mi­nisiteran’ny Asa vaventy) no misehatra voalohany mi­tondra fanampiana ny mpiara-belona fa ao anatin’ny fiarenana vao manohana ny sehatra manakaiky azy (fahasala­mana, fa­nabeazana, rano…) ny mpiray ombon’antoka rehetra.
Tondradrano koa ao Vohipeno

Ankoatra ny any Avaratra Atsinanana, misy tondradrano koa ao amin’ny distrikan’i Vohi­peno amin’izao fotoana izao. An-jatony ireo efa traboina ary olona iray no maty lasan’ny rano, araka ny tatitra azon’ny BNGRC. Efa midinika ny fa­nampiana hatao ny ekipa na­nomboka omaly.

Vonjy A.