Nifarana omaly ny atrikasam-pirenena ho amin’ny fanavaozana ny lalàna momba ny tanim-panjakana azo amidy. Nisy ny toromarika nomen’ny minisitry ny Fitsinjaram-pahefana sy ny fanajariana ny tany (MFFT) tamin’izany.
“Anisan’ny fototry ny fandriampahalemana ny filaminan’ny tontolon’ny fananantany. Hanova ny tantara isika amin’izao fanavaozana ny lalàna momba ny fananantany izao”, hoy izy. Nanteriny koa fa ilaina ny traikefa sy ny fahaiza-manao eo amin’ireo mpiasan’ny fananantany ka tokony hampiasaina ho amin’izany ireo manampahaizantsika. “Tsy tokony homena ireo “prestataire” ny asa raha manana ny tetibola tokony hahavitana ny asa isika”, hoy ihany izy. Nanambara kosa ny talen’ny fananantany (MFFT), Rakotobe Lydison Maminaina, fa nohatsaraina ny lalàna mifehy ny tanim-panjakana azo amidy. Niainga tamin’ny lesoka teo aloha ny fanitsiana natao ka nanaovana fakan-kevitra. “Naravona ny hevitra noraisina momba ny tanim-panjakana azo amidy. Hahitsy ny paikady ary hamoraina ny fahazoan’ny Malagasy tanim-panjakana. Jerena koa anefa ny hiarovana ny tanim-panjakana”, hoy izy. Naato kosa anefa aloha ny fandraisana fangatahana tanim-panjakana vaovao ho fanatanterahana ny fanapahan’ny filankevitry ny minisitra amin’ny fanavaozana ny fangatahana voaray eny amin’ny sampandraharahan’ny fananantany.
Fanamorana ireo dingana samihafa…
Nanteriny fa voakasiky ny tanim-panjakana azo amidy avokoa ny rehetra nefa kosa hofehezin’io lalàna io. Fanavaozana fitantanana amin’ny endrika vaovao avokoa no hatao ka anisany ny fampitaovana sy ny firosoana amin’ny niomerika.
Andrasana, araka izany, ny handalovan’io fanavaozana lalàna io eny amin’ny parlemanta.
Tsiahivina fa anisan’ny ezaky ny MFFT, hampihenana ny ady tany ny “Plan local d’occupation foncière – Plof”, ka ampiasana ny niomerika ahafantarana ny satan-tany, toy ny tanim-panjakana, ny an’olon-tsotra, ny faritra arovana… Eo koa ny fampiasana ny afisy eny amin’ny fokontany ho an’ireo tanim-panjakana nangatahana.
Synèse R.
French